خاطرة اليوم كتبها محمد بيطار ... يللي بقول غير هيك عميل للخارج ...؟
١٢ ديسمبر ٢٠١٥ ... مجرد ذكريات ...
صباح الخير جميعا نحن العرب عملاء للخارج .. وللي بيقول غير هيك عميل للخارج.
هيك طلع معي بعد متابعه وتدقيق وتمحيص. إذا بتحبو تعرفو كيف وليش بسيطه .. بيطلع على وسائل الاعلام سياسي ومفكر موالي لنظام بيقول انو هدول اللي تمردوا (مابيقول ثاروا )عملاء مدعومين من الخارج. وبيطلع سياسي ومفكر اخر معادي لنفس النظام بيقول انو هاد النظام عميل للخارج وانو الناس اللي قاموا ضده ثوار يدافعون عن الحرية والعدالة .. طبعا وهدول الساده السياسيين والمفكرين كل واحد عندو الحجج والأدلة والبراهين لتأكيد نظريته .. هيك بيطلع معنا انو كلنا عملاء وما حدا منا وطني ونضيف. هلق بيجي واحد بيقلك بس في حقيقه .. اكيد في حقيقه.. والحقيقة الوحيدة انو الحق إلى جانب الشعوب مهما كانت طبيعة وايديولوجية النظام. وطني. تقدمي. رجعي. جمهوري. ملكي.إلخ... لايمكن لملايين الناس ان يكونوا عملاء. ولكن يمكن لحاكم ان يكون عميل .. هي حقيقه ممكن تفوت بالعقل. وممكن تدخل ناس وتركب موجة الثورة وتوظفها لمصلحة قوى خارجيه. هون حديث اخر ولكن الثورة عمل شرعي وقانوني بكل الشرائع والدساتير. وللي بيقول غير هيك عميل للخارج .. يا جماعه يا حضرات الساده رجال الفكر والسياسة .. استحوا. وحسوا عادمكم .. هي الشعوب بلغت سن الرشد وكبرت ووعيت وبتعرف كل شي ... الله يرحم والدي كان يقول .. السياسة ما الها رب .. وانا بضيف والسياسيين مالهم رب. ايها السياسيون احترموا تضحيات الشعوب واتركوهم ليصنعوا تاريخا جديدا يليق بهذه الأمة العظيمة
